Category Archives: Lugge und Kare

Geplätscher…




Da Lugge und da Kare kumma sternhagelblau aus da Wirtschaft. Wia’s hoid so is bei de Bsuffan, miassn’s unterwegs bieseln. „Wia gibt’s iatz des, hicks?“ wundert sich da Kare, „dass’s bei mir plätschert, hicks, und bei dir ned?“ „Des is – hicks – ganz logisch“, moant da Lugge. „Du bieselst – hicks – an d’Wand und i hint – hick – an dein‘ Mantel!“

Lebensretter…




Da Lugge und da Kare liegn am Ufer vom Starnberger See. Auf oamoi hörn’s jemand um Hilfe schrein. „Herrschaft, i glaab, do dasauft oana!“ moant da Lugge und springt ins Wasser, da Kare hint‘ nach. Tatsächlich kenna’s den Schwimmer ans Land ziahng und da Lugge macht sofort Mund-zu-Mund-Beatmung. Da moant da Kare: „Oiso, i woaß ned, i glaab ned, dass des da Richtige is.“ „Wiaso?“ fragt da Lugge entgeistert? „Ja, schaug doch amoi g’scheid hi! Der hod d’Schlittschuah no o!“ 

Sprachentalent…




Fragt da Lugge an Kare: „Du, sog amoi, Kare, konnst du Englisch?“ Drauf da Kare ganz cool: „Oui, mon cher ami!“ Sagt da Lugge: „Geh weida, Depp, des is doch Französich!“ „Ah so, freili, des konn i aa!“

Tierisch…




Bayerische Witze für gute Laune und StimmungDa Lugge und da Kare ham eahnan Führerschein wegn Bsuffafahrn verlorn und miassn zum „Depperltest“. Da Lugge kummt ois erster dro. Nach fünf Minuten kummt a strahlend mit seim neia „Lappn“ ausm Prüfungszimmer: „Mei, des is ja überhaupts koa Problem“, beruhigt a an Kare, „zwoa Fragen kriagt ma gstellt, de konnst du aa leicht beantworten.“ „Ja, wos frogns nachad?“ wui da Kare wissn. „Was ist da Unterschied zwischen am Vogel und am Fisch?“ „Da Vogel konn fliang, da Fisch konn schwimma, hob i zur Antwort gebn – und scho hob i mein Schein wieder ghabt!“ Da Kare geht erleichtert in’n Prüfungsraum und kummt aa nach fünf Minuten wieder raus – allerdings mit ana „Lätschn“ bis zum Boden owe. Er hod sein Schein nimma kriagt. „Ja, wos is denn passiert?“ fragt’n da Lugge besorgt. „Warn deine Fragn so schwaar?“ ‚Was ist der Unterschied zwischen Adler und Hirsch?‘, ham’s mi gfragt. Und i hob gsagt: Da Adler hod am Montag und da Hirsch am Mittwoch Ruhetag!“

Heißes Wasser…




Da Lugge und da Kare arbadn in ana Großkantine und miassn Wasser für fuchzg Paar Weißwürscht und Wiener kocha. Wia d’Würscht fertig san, moant da Lugge: „Wos dean ma denn etz mit dem hoaßn Wasser? Is doch z‘schad zum Wegschüttn.“ „Dua di ned ab“, sogd da Kare, „des gfrier ma ei, weil a hoass‘ Wasser konn ma oiwei braucha.

Heißes Wasser in YouTube

Verantwortungsbewusst…




Da Lugge und da Kare wackeln mittn in da Nacht mit am saubern Affn in a Wirtschaft und ziahng an Spezl mit, der vor lauter Rausch ned amoi mehr steh konn. Sie legn an nebn eahna auf d‘ Wirtshausbank und bstelln bei da Kellnerin: „Bi-biii-iiiddescheen ssswei Ma-ass Bier und ssswei doppelte Ko-onni-onniagg. Der Herr da auf der Bank gri-igt nixxxss, des is unser Chau-auffeur!“

Aufrichtige Anteilnahme…




„Mei Beileid“, sagt da Lugge zum Kare, „i hob ghört, dass dei Schwiegermuadda gstorbn is. Wos hod’s denn g’habt?“ „Ned vui“, moant da Kare, „a weng an Schmuck, an oids Auto und a bissl a Bargeld.“ „So war doch des ned gmoant“, beschwichtigt da Lugge, „i moan, wos hod ihra gfehlt?“ „Zum Beispui a guade Altersversorgung, volle Sparbiacha oder Immobilien.“ „Herrschaft“, reagiert da Lugge gnervt, „i wui wissen an wos sie gstorbn is!“ „Ach so, des is wirklich bläd glaffa. Sie wollt Kadoffen aus’m Keller holn, is auf da Staffe ausgrutscht und hod se as Gnack brocha.“ „Und, wos habt’s dann gmacht?“, fragt da Lugge voller Anteilnahme. „Nudeln!“