D‘ Habermeierin is so krank, dass se ihr Mo ernsthaft Sorgen um sie macht und an Doktor oruaft. Der untersuachts und wiar a aus’m Krankenzimmer kummt, sagt a ganz ernst: „Eahna Frau gfoid ma gar ned, Herr Habermeier!“ „Mir aa ned“, moant der beleidigt, „aba de Eahnare is aa ned grad de Scheenste!“
Da Mo kummt von da Vorsorgeuntersuchung hoam. „Und, wos hod da Dokta gsagt?“ frogt sei Frau. „Du werst as ned glam, aba da Dokta hod gsagt, i hob a Wanderorgan.“ „Ah, red doch koan soichan Schmarrn“, geht sie in d’Luft. „Oiso, wos genau hod a gsagt?“ „Mei Leber is im Arsch!“
„Und, wos hod da Dokta gsagt?“ frogt da Mo sei Frau, wia’s vom Dokta hoamkummt. „Ganz begeistert war a“, schwärmt’s. „Nur Komplimente hod a ma gmacht. Mit fuchzg Johr so a scheens Gsicht, mit fuchzg Johr so an scheena Busen, mit fuchzg Johr so a Traumfigur, mit fuchzg Johr…“ „Is scho guad“, untabricht‘s da Mo, „und wos hod a zu dei’m fuchzgjahrign Arsch gsagt?“ „Über di hamma gor ned gredt!“