Category Archives: Polizeiwitze

Beziehungen…




Sitzn wia jede Woch a Gymnasiallehra, a Realschuilehra, a Voiksschuilehra und a Huifschuilehra im Haus vom Gymnasiallehrer beim Kartl’n beinanda. So umra zwölfe is dann as Bier aus und da Realschuilehrer moant: „des macht, i wohn glei ums Eck. I fahr schnei amoi hoam und hoi a Tragl Hells.“ Gsagt is do und scho 10 Minutn spada is a wieda do — allerdings ohne Bier. „Stellts eich vor, wia i rechtsrum fahr, steht d‘ Schmier, hoit mi auf, last mi blosn und, wos soi i eich sagn? 1,2 Promill und da Lappn is weg – tuat ma echt leid!“ Sogt da Hauptschuilehra: „Macht nix, i wohn links rum, do steht d‘ Schmier bestimmt ned – i hoi bei mir dahoam a Tragl.“ Gsagt is do und nach zehn Minutn is a wieda do — aa ohne Bier. „Des gibt’s doch gar ned, wia i linksrum fahr, steht da a d‘Schmier, hoit mi auf, last mi aa blosn und, wos soi i eich sag’n? 1,5 Promui und mei Lappn is etz aa weg – tuat ma echt leid!“ „Des is zwar saubläd, aber ned schlimm“, sogt da Huifsschuilehra, „i wohn grodaus und de Bazen wer’n doch ned da aa no steh – i hois s‘Bier bei mir dahoam.“ Nach fünf Minutn is a scho wieda do — mit zwoa Tragl Bier. Etz woin de Kollegn natürliich vom Huifsschuilehra wissn, ob er aa vo da Schmier kontrolliert worn is. „Ja, scho, aba i kenn doch meine Buam!“ (unbearbeitete Originalfassung)

Vermisstenmeldung…




A Mo kummt ganz aufgregt aufs Polizeipräsidium und zoagt dem Beamten a Buidl vo seina Frau: “Herr Wachtmoasta, i mecht a Vermisstenmeldung aufgebn, mei Frau is seit zwoa Dog nimma hoamkemma. Bitte, bitte, suacha S’es!” Da Polizist schaugt se des Buidl lang o und frogt: “Warum?”

Sicheres Erkennungsmerkmal…




A Bsuffana wackelt übern Parkplatz und dappt mit de Händ über jeds Autodach. Da Parkwächter schaugt eahm amüsiert zua und frogt: „Moana S‘, dass S‘ eahna Auto a so leichter finden?“ „Fraa-aale“, lallt da Bsuffane, „mei Auto hod a Blauliacht!“

Bewerbung…




„Host scho ghead, Sepp? D’Polizei suacht an Mo, groß, stark, broade Schultern, der wo jede Woch‘ in a anders Schmuckgschäft eibricht!“ „Moanst, soi i mi amoi bewerbn?“

Passende Arbeitskleidung…




A nackada Radler fahrt übern Viktualienmarkt und werd vo zwoa Wachtmoasta aufghoitn. Da oane fragt: “Sogn S’ amoi, warum fahrn Sie am helliachtn Dog nackad mittn in München umanand? Des gibt a saftige Straf!” “I konn ma nix mehr zum Oziang leistn, Herr Wachtmeister, i hob a Frau und acht kloane Kinder dahoam.” Do sagt da anda Polizist: “Ja, wenn des so is, kenna S’ weidafahrn, Sie ham ja s’Arbadsgwand o!”

Bildungsvortrag…




Polizeikontrolle am Stachus, zwoa in da Nacht. Da Beamte fragt an Eglinger Bene: „No, wo wolln ma denn no hi so spät in da Nacht?“ „I bin unterwegs zu am Vortrag über die Folgen von zu wenig Schlaf, Glücksspiel, Kartenspuin, Nikotin- und Alkoholmissbrauch.“ „Des is ja interessant“, moant da Wachtmoasta, „und wer, bittschön, hoit mitten in da Nacht so a Referat?“ „Mei Frau…“

Alkoholkontrolle…




Da Schorsch aus Mitterdarching fahrt bsuffa mit’m Auto und kummt in a Polizeikontrolle. “Wia’s ausschaugt, ham Sie a bissl z’vui Alkohol konsumiert, drum derfa S’ etz in des Röhrl blasn!”, sagt oana von de Schandarm. “Geht ned”, moant da Schorsch, “i hob Asthma!” “Dann miassn S’ zur Blutentnahme!” “Geht aa ned, i bin Bluadda!” Etz wern d’Schandarm langsam grantig: “Guad, nachad gengan S’ fünf Meter auf dera weißen Linie!” Sagt da Schorsch: “Geht erst recht ned, mit mei’m Saurausch konn i des nimmer!”